علي يا اغلى كل غالي
علي يا اغلى كل غالي.....علي يا اول و تالي
علي وبس انته تحلا لي...علي وبس انته تحلا لي
* * * * *
همت و الشوكَــ جنني.....يبو السبطين
يداحي الباب مو وحدة.....الـــك بــابين
باب ابمعركة خــيبر...و باب الجنة يا حيـدر
غـرام الروح نسـانــي.....ذكـرت اثنين
بعـد لـك بـــاب ناسيها.....يضـــي العين
تعال اكَبالي و اتصور...اراوي لك عشكَـ اخضر
الك يـالعايش اببالي.....افتحت لك باب دلالي
علي وبس انته تحلا لي...علي وبس انته تحلا لي
* * * * *
الك تــاريخ عن خيــبر.....يليـــث الغــاب
بطل معروف و ابجفــك.....قلعــت البـــاب
قلعتها و انصرت دينك...يحيدر عاشت ايمينك
اعله راس الموت تتخطه.....حسبت احساب
غـضب فتــــاك يـا نازل.....على الاحــــزاب
بطل ثبتت مــوازينـــك...الك شهدت ميـادينك
علي و راسك يظل عالي..... علي و بالشدة متبالي
علي وبس انته تحلا لي...علي وبس انته تحلا لي
* * * * *
مثل هالحال يا حيـدر ..... حصــل ويـــاي
اشوف اجيوش مجموعة.....ابضمير احشاي
صحت ويلاه و الهفي...غرامي بالكَلب مخفي
لكَـيت الباب مسدودة.....و ادور اهـــواي
قلعت الباب من كَلبي.....ابعزم يمـنــــاي
قلع باب الكَلب جفي...ندهتك فوت يا ولفي
يمن وجهك تهيا لي.....شمس و اتغازل اهلالي
علي وبس انته تحلا لي...علي وبس انته تحلا لي
* * * * *
يبو السبطين بالمحشر.....الـك اســرار
تكَف عالبــــاب بـالجنة.....يحامي الجار
دخول الجنة يتقدر...الك يا ســاقي الكــوثر
نشوف البـــاب مفتاحه.....بيمينك صار
التمسك بيك تشفع له.....يبـــو الاطهار
الك رب العرش قرر...شفيع ابساعة المحشر
و اقدم صفحة اعمالي.....الك يا كعبة امالي
علي وبس انته تحلا لي...علي وبس انته تحلا لي
* * * * *
دخلت ابباب دلالي.....و سكنت الروح
اجيك اهناك و اتعنه.....ابجفن مشبوح
و اكَل لك يا علي انته...دخلت ابكَلبي و اسكنته
اريد اليوم تشفع لي.....و تكَل لي روح
الك هــالباب للجنة.....و درب مـفتوح
امل عنــدي و تأملته ...احـقق هـالامـل يــمته
عبير الفرحة يصفا لي.....و انول ابجفي سلسالي
علي وبس انته تحلا لي...علي وبس انته تحلا لي
* * * * *
وعد مـوعود عالكوثر.....وعدنا اهناك
ابرحيق الكاس تروينا.....و تمد يمناك
الــه اللــــي رفــع مجدك...خلق جنة عــدن لــجلك
سحر معـناك هيمني.....سحر معناك
الك اوصـاف ما واحد.....حملها اوياك
علي و بس النبي ايشبهك...علي و لمن شفت وجهك
وجه طه تراوا لي.....و اسمعه يهتف ابدالي
علي وبس انته تحلا لي...علي وبس انته تحلا لي